Ziska prezan tourism i’n pilye prensipal lekonomi Sesel. Se komsi Sesel ti pe debout lo en sel lipye. Osi lontan ki sa lendistri i’n marse, nou pann poz nou okenn kestyon. Nou ti satisfe, nou pann bouze. Nou pann mazin lavenir. Me Covid-19 i’n vin afekte nou lekonomi. Sa i’n fer nou’n realize ki, nou pa kapab fye zis lo tourism. Nou lekonomi pa kapab repoz lo en sel pilye. Nou lekonomi i bezwen repoz lo plizyer pilye. Otreman di, i annan en bezwen pour gouvernman diversifye lekonomi pei.
Se larezon ki Minis Devika Vidot, Minis pour Lenvestisman, Antreprenarya ek Lendistri i’n anons lentansyon gouvernman pou fer reviv lendistri kannel, dan pei. Byen sir, rol gouvernman i plito pou ed sekter prive, ki tia kontan anbark dan sa lendistri. Sa tia ava ede diversifye lekonomi pei, olye fye zis lo tourism. Kannel i kapab vin en lot sours reeni pour pei.
Lontan kannel ti ganny eksplwate, par plizyer gran propriyeter. Zot ti fer lekors kannel, e zot ti annan kalorifer pou distil fey kannel pou ganny son lesans. Lekors ek lesans kannel ti ganny eksporte. Sa ti en sours reveni an deviz pour pei. Sa lendistri ti anplway plizyer dimoun, zonm konman fanm. Sa lendistri i’n fer viv en kantite dimoun dan Sesel. Zot ti bat kannel pou ganny zot lavi.
An plis ki lendistri kannel, ti annan osi lendistri kopra ek delwil koko. Kopra ti ganny eksporte, e sa ti ankor en lot sours reveni an deviz etranzer. Seselwa ti servi delwil koko pou kwir manze, e pounak pou nouri zannimo. Nou pa ti bezwen enport delwil, ni nouritir pour zannimo. Plizyer dimoun, zonm konman fanm, i’n ganny zot lavi, dan lendistri kopra ek delwil. Sa lendistri ti osi ede koup enpe depans lenportasyon.
Me avek lendistri tourism, sa de lendistri (kannel ek kopra) i’n ganny abandonnen, o profi lendistri tourism. Nou ti ganny dir ki touris pou anmenn larzan dan pei, e pour annan travay an kantite. I vre ki sa lendistri i’n anmenn larzan ek travay. Par kont bat kannel ek ranmas koko pou fer kopra ti ganny war konman en travay lesklav.
Ler nou dir ki bat kannel, e ranmas koko, ti en travay lesklav, nou pe devalye sa kalite travay. Tou travay inob, tou travay i en servis pour lezot, en servis pour sosyete. Nou pa kapab konpar bat kannel, ou swa ranmas koko, avek travay lotel. Travay parey bat kannel, ek ranmas koko, i pli dir ki travay lotel, ou byen travay biro. Me ozordi dimoun ki pou al bat kannel, zot pa pou fer li dan mem kondisyon, ki 50an pase. Ni pou menm lapey. Kondisyon travay ek lapey pour diferan. Si kondisyon i bon, si lapey osi i bon, personn pa pou dir ki bat kannel i en travay lesklav. Eski se travay bat kannel limenm ki en travay lesklav, ou byen, se sa bann move kondisyon ek move lapey, k’in fer dimoun dir ki i en travay lesklav ?
Si nou dir bat kannek ek ranmas koko i en travay lesklav, ki nou pou dir lo travay sekirite pandan lannwit. ? Ki nou pou dir lo travay debarder ? En mason, ki travay tou lazournen dan soley, pou monte en lakaz, eski sa i en travay lesklav ? Ozordi i annan en kantite travay lesklav modern ki nou pa koz lo la. Par egzanp prostitisyon. Sa i en travay ki degrad, ki dezonor dimoun. En dimoun ki fer biznes drog, i vin limenm en leksklav, e i fer lezot dimoun vin lesklav drog, e drog i touy dimoun. Par kont si en propriyeter i pey dimoun byen pou bat kannel, e dan bon kondisyon, mon pa war okenn lesklavaz. Alor, akoz nou dir ki bat kannel i en travay lesklav ?
Pere Edwin Mathiot