Katryem dimans Pak i dimans vokasyon. Nou tou, nou annan en vokasyon. Vokasyon i en
lapel Bondye. Mon pa swazir mon vokasyon. Se Bondye ki apel mwan, se Bondye ki swazir
mwan. « Pa zot ki’n swazir mwan, me se mwan k’in swazir zot ». Jean 15/16.
Souvan-d-fwa, kan nou tann koz lo vokasyon, nou mazin vokasyon pret, relizye, relizyez.
Me i annan osi, sa ki nou apel bann vokasyon laïk, Par egzanp maryaz. ( vokasyon kozigal)
ek vokasyon selibater.
Me nou premye vokasyon, vokasyon ki labaz tou lezot vokasyon, se vokasyon baptismal. Se
lapel Bondye pour nou vin en manm Zezi Kri, Otremandi se nou vokasyon kretyenn, zour
nou batenm.
Mariaz i en vokasyon. Mariaz i en repons lapel Senyer. Bondye ki lanmour i’n kree zonm ek
fanm par lanmour, e pour lanmour. Dan mariaz, zonm ek fanm i ganny apele pour vin sen, e
pour vin temwen lanmour Zezi. Tou dimoun, marye ou pa marye in ganny apele pour vin sen.
Bondye i apel en dimoun direkteman ou byen endirekteman (par lentermedyer en lot
dimoun), Par egzanp, Pol i ganny apele diretkeman par Zezi, lo semen Damas. Par kont, Mari
i ganny apele par lanz Gabriel. Ou kapab ganny apele par en levennman. Par egzanp, Sen
Inyas de Loyala, ti ganny blese dan lager Bondye ti apele, ler i ti lopital, I annan kin ganny
apele, ler zot ti pe lir lavi en sen.
Dan tou vokasyon, i annan 2 keksoz : lapel Bondye, ek la repons sa dimoun kin ganny apele.
Son repons i kapab en « Wi ou en Non. » « Here I am Lord ». « Je suis la servante du
Seigneur
Vokasyon pour en misyon. Kan Bondye i apele, se pour en misyon. Nou tou, nou annan en
vokasyon, e en misyon. Nou ganny apele pour vin temwen lanmour Bondye dan lemonn. Se
lanmour ki pour fer nou vin sen.