Eski ou konnen ou annan trwa fanmiy? Oun touzour krwar ki ou fanmiy se ou papa, ou manman ou bann frer ek ser. Petet osi avek ou gran paran. Sa se ou fanmiy byolozik, fanmiy menm disan. Me ou annan osi en lot fanmiy: “Se Legliz, lafanmiy tou bann zanfan Bondye.” Zour ou batenm, ou’n vin zanfan Bondye. E ou’n vin frer ek ser Zezi Kri. Par konsekan, tou bann batize i’n vin frer ek ser avek kanmarad. Anfen, ou trwazyenm fanmiy, se lasosyete Seselwa. Ou en manm sa trwa fanmiy.
Le 9 ek 10 oktob, a Ronm, le Pap François pou ouver en sinod avek tit: Pour en Legliz sinodal.” E dimans 17 oktob, sa synod pou ganny ouver dan tou bann dyosez dan lemon. Pour nou Sesel, louvertir pour ganny fer, par Monsenyer Alain Harel, dan en seremoni, dan Katedral Imakile Konsepsyon.
Sinod i vedir “mars ansanm” “fer laroute ansanm.” Se tou bann manm Pep Bondye: “Levek, pret, dyak ek tou bann layik, ki pou mars ansanm, ki pou fer laroute ansanm, dan menm dirksyon. Se tou bann zonm, fanm, zenn, vye dimoun, zanfan ki pou mars ansanm. Pratikan konman non-pratikan. Dan sa sinod, nou tou, nou pou ekout kanmarad. Lekout i premye keksoz ki nou pou fer. Sakenn i annn keksoz pou dir. En Legliz sinodal, i en Legliz ki ekoute. Legliz i zafer tou bann batize. Tou dimoun pou ganny konsilte.
Answit, nou pou ekout Parol Bondye. Bondye i koz avek nou par son Parol. Alor ki Bondye i annan ozordi, pou dir son Legliz, dan Sesel. Nou pou ekout Lespri-Sen, me Lespri- Sen i koz osi par lezot dimoun. Se larezon ki nou bezwen ekout tou dimoun. Vwala i en travay lekout ek konsiltasyon, ki nou annan pou fer ziska avril 2022.
Ki mannyer pou fer sa travay lekout ek konsiltasyon? Konman nou dan lannen lafanmiy, nou pou konmans dabor fer sa lekout, dan nou prop fanmiy, nou fanmiy byolozik. Savedir dan lakour, kot nou reste, kot nou pe viv. La fanmiy i osi Legliz domestik, Legliz dan lakour. Alor nou pou konmans lekout, konsiltasyon dan fanmiy. Lafanmiy i osi labaz Legliz. Tou manm lafanmiy pou mars ansanm, pou fer rout ansanm.
Answit, nou pou fer sa travay lekout ek konsiltasyon, dan sak parwas. Dan sak parwas i annan en Legliz. E dan sak parwas i annan bann mouvman, bann servis, ek bann lezot group. Leglize se mwan, se nou. Legliz se mon fanmiy, se lafanmiy tou zanfan Bondye, kot nou viv kot a kot. Alor tou bann batize, ki zot frekan Legliz, ou ki zot pa frekant legliz, zot pou mars ansanm, nou pou fer larout ansanm. Legliz i zafer tou bann batize. Se la kot bann batize i rankontre, kot zot sipoze viv konman frer ek ser, dan lafwa an Kris. Tou dimoun, dan parwas pou mars ansanm, pou fer larout ansanm, dan menm direksyon.
Anfen, lekout ek konsiltasyon, pou ganny fer osi dan sa trwazyenm fanmiy ki apel “ lasosyete Seselwa”. Lafanmiy i dan lasosyete, Legliz osi i dan lasosyete. Se tou bann fanmir ki form lasosyete, kot nou viv kot a kot. Apre Legliz, lasosyete i en lot gran, pli gran fanmiy, formen par bann fanmiy byolozik.. La fanmiy i labaz lasosyete.
Pou fer sa lekout ek konsiltasyon, dan fanmir, dan parwas, e dan lasosyete, i pour annan en pti lekip, ek en livre, avek detrwa kestyon, pou ed nou, pou gid nou, dan nou refleksyon.
Père Mathiot.